ಪರಸ್ಪರ ಪ್ರೀತಿಸಿ ಮನೆಯವರನ್ನೂ ಒಪ್ಪಿಸಿ ಮದುವೆಗೆ ಸಿದ್ಧತೆ ಮಾಡಿಕೊಂಡಿದ್ದ ಜೋಡಿಯೊಂದು ಧಾರುಣವಾಗಿ ಮೃತಪಟ್ಟಿರುವ ಘಟನೆ ತುಮಕೂರು ಜಿಲ್ಲೆಯಲ್ಲಿ ನಡೆದಿದೆ. ಪ್ರಿಯಕರ ಅಪಘಾತದಲ್ಲಿ ಮೃತಪಟ್ಟರೆ, ಮದುವೆಯಾಗಬೇಕಿದ್ದ ಯುವತಿ ಆತನ ಸಾವನ್ನು ಜೀರ್ಣಿಸಿಕೊಳ್ಳಲಾಗದೆ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ.
ಅವರಿಬ್ಬರೂ ಪ್ರೀತಿಯ ಅಲೆಯಲ್ಲಿ ತೇಲುತ್ತಿದ್ದರು. ಅವರ ಪ್ರೇಮಕ್ಕೆ ಹೆತ್ತವರ ಆಶೀರ್ವಾದವೂ ಇತ್ತು. ನಾವು ನಿಮ್ಮ ಮದುವೆ ಮಾಡುತ್ತೇವೆ, ಒಟ್ಟಾಗಿ ಬಾಳಿ ಎಂದು ಹಿರಿಯರು ಹರಸಿ, ಆಶೀರ್ವದಿಸಿ ವಿವಾಹ ನಿಶ್ಚಯವನ್ನೂ ಮಾಡಿದ್ದರು. ಆದರೆ ವಿಧಿಗೆ ಮಾತ್ರ ಅವರು ಒಂದಾಗೋದು ಇಷ್ಟವಿರಲಿಲ್ಲ.
ತುಮಕೂರು ತಾಲ್ಲೂಕಿನ ಮಸ್ಕಲ್ ಗ್ರಾಮದ ಧನುಷ್ ಹಾಗೂ ಅರೆಹಳ್ಳಿಯ ಸುಷ್ಮಾ, ಜೋಡಿ ಹಕ್ಕಿಗಳಂತೆ ಪ್ರೇಮಲೋಕದಲ್ಲಿ ಹಾರಾಡುತ್ತಿದ್ದರು. 23 ವರ್ಷದ ಧನುಷ್, ಬೆಂಗಳೂರಿನಲ್ಲಿ ಸ್ವಂತ ಬಟ್ಟೆ ಅಂಗಡಿ ಸ್ಥಾಪಿಸಿಕೊಂಡು ವ್ಯಾಪಾರ ವಹಿವಾಟಿನಲ್ಲಿ ತೊಡಗಿದ್ದರು. 22 ವರ್ಷದ ಸುಷ್ಮಾ ಎಂಕಾಂ ವ್ಯಾಸಂಗ ಮಾಡುತ್ತಿದ್ದರು. ಇವರಿಬ್ಬರ ಪ್ರೀತಿಯ ವಿಚಾರ ಕುಟುಂಬಸ್ಥರಿಗೆ ಗೊತ್ತಾದ ಬಳಿಕ, ಎರಡೂ ಕುಟುಂಬದವರು ಪರಸ್ಪರ ಸಮ್ಮತಿಯೊಂದಿಗೆ ಮದುವೆ ನಿಶ್ಚಯ ಮಾಡಿದ್ದರು. ಆದರೆ ವಿಧಿಯಾಟ ಬೇರೆಯೇ ಇತ್ತು.
ಮೇ 11ರಂದು ಧನುಷ್ ಅವರು ತಮ್ಮ ಊರಿನ ಜಾತ್ರೆಗೆ ಬರುವ ವೇಳೆ, ನೆಲಮಂಗಲದ ಕುಲಾನಹಳ್ಳಿ ಬಳಿ ಭೀಕರ ಅಪಘಾತ ಸಂಭವಿಸಿತ್ತು. ಈ ವೇಳೆ, ದುರಾದೃಷ್ಟವಶಾತ್ ಧನುಷ್ ಅವರು ಸ್ಥಳದಲ್ಲೇ ಸಾವಿಗೀಡಾಗಿದ್ದರು. ಭಾವಿ ಗಂಡ ಪ್ರಿಯಕರನ ಸಾವಿನ ಸುದ್ದಿ ಕೇಳಿ, ಯುವತಿ ಸುಷ್ಮಾ ತೀವ್ರ ಆಘಾತಕ್ಕೆ ತುತ್ತಾಗಿದ್ದರು. ನೋವಿನ ನಡುವಲ್ಲೇ ಪ್ರಿಯಕರನ ಅಂತ್ಯ ಸಂಸ್ಕಾರದಲ್ಲೂ ಸುಷ್ಮಾ ಭಾಗಿಯಾಗಿದ್ದರು. ಆ ನಂತರ ಧುನುಷ್ ನೆನಪಿನಲ್ಲೇ ಸುಷ್ಮಾ ಕಣ್ಣೀರು ಹಾಕುತ್ತಿದ್ದರು. ಬಾಳ ಸಂಗಾತಿಯಾಗಬೇಕಿದ್ದ ಧನುಷ್ ಇನ್ನಿಲ್ಲ ಎಂಬ ಸತ್ಯವನ್ನು ಅರಗಿಸಿಕೊಳ್ಳಲು ಸಾಧ್ಯವಾಗದ ಸುಷ್ಮಾ, ಮೇ 14ರಂದು ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದರು.
ಈ ವೇಳೆ ಕುಟುಂಬಸ್ಥರು ನಾಲ್ಕಾರು ಆಸ್ಪತ್ರೆಗಳಿಗೆ ಸುಷ್ಮಾ ಅವರನ್ನು ಕರೆದೊಯ್ದು ಚಿಕಿತ್ಸೆ ಕೊಡಿಸುವ ಸಾಹಸ ಮಾಡಿದರು. ಆದರೆ, ಪ್ರಿಯಕರನ ಹಾದಿಯನ್ನೇ ತುಳಿದಿದ್ದ ಸುಷ್ಮಾಗೆ ಯಾವುದೇ ಚಿಕಿತ್ಸೆ ಫಲಕಾರಿಯಾಗಲಿಲ್ಲ. ಮೇ 14ರ ರಾತ್ರಿ 8 ಗಂಟೆ ಸುಮಾರಿಗೆ ಸುಷ್ಮಾ ಕೂಡಾ ಇಹಲೋಕ ತ್ಯಜಿಸಿದರು.ಈ ಜೋಡಿ ಸಾವಿನಲ್ಲಾದ್ರೂ ಒಂದಾಗಲಿ ಎಂದು ಪೋಷಕರು ಕಣ್ಣೀರ ವಿದಾಯ ಹೇಳಿದ್ದಾರೆ.
ಒಂದೆಡೆ ಯುವಕ ಧನುಷ್‌ನ ಹೆತ್ತವರು ಮಗನನ್ನು ಕಳೆದುಕೊಂಡರೆ, ಸುಷ್ಮಾ ಅವರ ಪೋಷಕರು ಮಗಳ ನಿಧನದ ಶೋಕದಲ್ಲಿದ್ದಾರೆ. ಮದುವೆಯ ಕನಸು ಕಂಡಿದ್ದ ಈ ಜೋಡಿ ಸಾವಿನಲ್ಲಾದ್ರೂ ಒಂದಾಗಲಿ ಎಂದು ಕಣ್ಣೀರ ವಿದಾಯ ಹೇಳಿದ್ದಾರೆ. ತುಮಕೂರು ಜಿಲ್ಲೆಯ ಹೆಬ್ಬೂರು ಪೊಲೀಸ್ ಠಾಣೆಯಲ್ಲಿ ಈ ಸಂಬಂಧ ಪ್ರಕರಣ ದಾಖಲಾಗಿದೆ.